Sumarhópurinn boðaði til borgarafundar á Hótel Borg, hinn 14. nóvember 1981, til að kanna hug fólks til framboðs kvenna í sveitarstjórnarkosningum 1982. Fundurinn var lítið auglýstur enda ekkert fjármagn fyrir hendi til auglýsinga. Blaðamannafundur var haldinn deginum áður þar sem Helga Kress, Helga Ólafsdóttir, Hjördís Hjartardóttir, Kristín Ástgeirsdóttir og Kristín Jónsdóttir kynntu hugmyndir um framboðið.

Yfir sex hundruð manns, aðallega konur, mættu á fundinn og urðu margir frá að hverfa. Nokkrar konur sem mættu voru þekkt andlit úr öðrum flokkum og höfðu reynt á eigin skinni að þær komust ekkert áfram enda nóg af körlum í fleti fyrir.

Kristín Ástgeirsdóttir blaðakona á Þjóðviljanum, Ásgerður Jónsdóttir kennari og Þórhildur Þorleifsdóttir leikstjóri fluttu ræður. Fundarstjórar voru Sigríður Dúna Kristmundsdóttir mannfræðingur og Helga Sigurjónsdóttir kennari.

Mikil stemning skapaðist á fundinum og ræðurnar féllu í góðan jarðveg. Á eftir framsöguerindum gafst kostur á fyrirspurnum og sköpuðust líflegar umræður. Mikil orka og kraftur var í salnum sem hreif konur. Yfirgnæfandi meirihluti fundargesta lýsti sig fylgjandi sérstöku framboði kvenna og samþykkt var að bjóða fram að vori.

Helgina sem fundurinn var haldinn hófst verkfall prentara og blöðin komu ekki út aftur fyrr en 25. nóvember. Í fjölmiðlum er því lítið fjallað um fundinn.

 
Skjöl er varða fundinn (PDF).